خطوات لازم تعملها قبل ما تبدأ مشروعك

نجاحك فى اى حاجه  بيبدأ من طريقة تفكيرك وبالذات فى مجال العمل الحر وادارة المشاريع الصغيرة فلو بتبدأ مشروع صغير 

هقولك على 6 تغييرات تعملها فى طريقة تفكيرك هتساعدك انك تنجح فى مشروعك وفى حياتك:-

1-  اول حاجه مفروض تعملها انك تحدد الفلوس هتيجى منين ودى مشكله بيقع فيها كتير من رواد الاعمال واصحاب المشاريع الصغيره لما بيبدأ مشروع لانه هوايه او حاجه بيحبها زى مثلا رسام او فنان تشكيلى فهوه بيحب يرسم واكيد هيقعد يرسم ليل ونهار لان دى الحاجه اللى بيعشقها  لكن لو هوه مش محدد من البداية مصدر الفلوس  والدخل والربح بالنسباله  هيكونوا ايه فى النهاية المشروع بتاعه هيفشل لازم يفكر مثلا هل هسوق  لمشروعى عن طريق صفحه على الفيس بوك اعرض فيها لوحاتى ولا هعمل افلام على اليوتيوب اورى للناس فيها انا ازاى برسم ولا هحول اللوحات بتاعتى لاشياء عملية ممكن تستخدم كديكور فى البيت كل دى طرق ممكن تتحول بيها الفكره بتاعته او الهواية بتاعته لمصدر للدخل الفلوس هيه الدم اللى بيجرى فى عروق البزنس فلو مفيش فلوس البزنس بيموت

2- التغير التانى انك تعيش شخصية الناجحين تونى روبنز عنده نصيحه بيقول انك مش لازم تخترع العجله مش لازم تبتدى حاجه محدش عملها قبل كده كل الحاجات اللى انت بتفكر فيها غالبا فى حد عملها ونجح  فيها قبلك فهو بيقول تقمص شخصية الشخص الناجح ده افعاله وتصرفاته وطريقة تفكيره وامشى على نفس الطريق اللى مشى عليه مش مضطر ان انت تمشى على طريق محدش مشى فيه قبل كده او طريق مهجور لان احتمال كبير انك تتوه او تاخد وقت كتير على بال ما توصل امشى على طريق معروف وطريق حد مشى عليه قبلك وفرصه نجاحك ووصولك هتكون اكبر بكتير

3- التغيير الثالث  انك لازم تكون عارف بالتحديد ساعتك تساوى كام طبعا انت فاهم ان انا مقصدش ساعة الايد بكام انا اقصد ساعة الشغل بتاعتك بتتباع بكام سواء كان فى انتاج منتج او خدمه والمفهوم ده  بيتوه عن ناس كتير من اللى بيبدأو بزنس جديد لانه فى البداية بيحاول يعمل كل حاجه لوحده ممكن يكون هوه بيعمل تصميمات المشروع الهندسى وفى نفس الوقت بيرد على التليفونات وكمان فى اخر اليوم هوه اللى بيرمى الزباله لكن لو حسب الساعة  بتاعة الحد اللى هيساعده فى شغلانه معينة فلوهوه مثلا محتاج لسكرتيره  وساعة السكرتيره ب 20 جنيه ولو نفرض ساعته هوه ب100 جنيه فكل ساعه هوه بيشتغل فيها وظيفة السكرتيره هوه بيخسر 80 جنيه كمان لازم تكون فاهم ان مهارتك فى التسويق لازم متقلش اهمية عن مهاراتك فى الحرفه او المهنه اللى انت بتعملها لان مهما كنت شاطر فى مهنتك لو محدش حس بيك انت بالظبط عامل زى حد بيغمز فى الضلمه محدش شايفه ولا حد حاسس بيه

4- التغير الرابع انك لازم تكون متفائل والحقيقة التفاؤل ده مش من الهوا لان انت كراجل بتشتغل فى  مشروع صغير عندك سببين منطقيين للتفاؤل السبب الاول  ان النهارده التسويق بقى فيه مجالات كتير رخيصه او غير مكلفه او ببلاش زى مثلا  التسويق على السوشيال ميديا الى حد ما غير موازين القوى  وبالتالى تقدر تسوق للمنتج بتاعك بكفاءه وفاعليه لاتقل عن الشركات الكبيره الحاجه التانية الحقيقه ان انت عندك ميزه اكتر من الشركات الكبيره متستغربش انت فعلا عندك ميزه  اكتر من الشركات الكبيره لان الشركات الكبيره بتكون مقيده  بروتين وتسلسل قيادى علشان تغير اى حاجه تتجاوب مع متغيرات السوق عايزه تاخد وقت كتير جدا لكن انت فى مكان العمل الحر او فى المشروع الصغير تقدر تستجيب للزبون علطول وتتجاوب مع السوق بشكل احسن بكتيرمن الشركات الكبيره

5- التغير الخامس ان لازم يكون عندك استعداد للمخاطره فى كل قرار انت بتاخده يمكن يكون لاول مره انت بتعمله يمكن يكون لاول مره بيحصل وكمان طول ما انت مستمر فى العمل هيقابلك قرارات بشكل ده باستمرار فانت فبه دايما معامل مخاطره موجود لو انت بتخاف من  المخاطره ومش عاوز  تاخد اى مخاطره احتمال انك تنجح فى المجال الخاص مش كبير اوى

6- التغيير السابع ان مع الاسف لازم تتوقع تكسير المجاديف هتلاقى حواليك ناس بتحاول تكسر مجاديفك  وتحاول تقلل من انجازاتك اوتخوفك ده لان هما باصين ليك وللنجاح اللى انت عملته وشايفين الفرصه اللى انت بتتوجه ليها وهما خايفين ياخدوا الاكشن ده فبيكون رد فعلهم انهم يقللوا من انجازك والبالتالى فى المقابل لازم تحوط نفسك بالناس الناجحين الناس اللى عندها نفس طريقة التفكير دى جيم رون عنده مقوله حلوه اوى بيقول:-

 ان انت متوسط الخمس اشخاص اللى حواليك فلو الخمس اشخاص
اللى حواليك ناجحين انت هتكون ناجح

الخلاصه:-

      ان النجاح بيبدأ بالافكار الصح ابدأ بتغيير افكارك واكيد ان شاء الله هتكون على الطريق للنجاح